من الفرعون إلى شعب مصر
من الفرعون إلى شعب مصر
يا شعبي وحبيبي، يا بختي ونصيبي، باحاطك في جيبي، يابن الحلال
يا شعبي يا شاطر، يا جابر خواطر، يا ساكن مقابر، وصابر وعال
يا واكل سمومك، يا بايع هدومك، يا حامل همومك، و شايل جبال
يا شعبي يا نايم، وسارح وهايم، وفي الفقر عايم، وحاله دا حال
احبك محشش، مفرفش مطنش، ودايخ مدروخ، واخر انسطال
احبك مكبر، دماغك مخدر، ممشي امورك، كدا بالتكال
واحب اللي ينصب، واحب اللي يكدب، واحب اللي ينهب، ويسرق تلال
واحب اللي شايف، وعارف وخايف، وبالع لسانه، وكاتم مقال
واحب اللي قافل، عيونه وغافل، واحب البهايم، واحب البغال
واحب اللي راضي، واحب اللي فاضي، واحب اللي عايز، يربي العيال
واحب اللي يائس، واحب اللي بائس، واحب اللي مُحبط، وشايف مُحال
واحبك تسافر، وتبعد تهاجر، وتبعت فلوسك، دولار أو ريال
واحبك تطبل، تهلل تهبل، عشان ماطش كوره، وفيلم ومقال
واحبك تأيد، تعضد تمجد، توافق تنافق، وتلحس نعال
تحضر نشادر، تجمع كوادر، تلمع تقمع، تظبط مجال
لكن لو تفكر، تخطط تقرر، تشغل لي مخك، وتفتح جدال
وتبدأ تشاكل، وتعمل مشاكل، وتنكش مسائل، وتسأل سؤال
أوعايز تنور، وعايز تطور، وتعمللي روحك، مفرد رجال
ساعتها حجيبك، لايمكن أسيبك، وراح تبقى عبره، وتصبح مثال
حبهدل جنابك، وأذل اللي جابك، وحيكون عذابك، ده فوق لحتمال
وامرمط سعادتك، واهزأ سيادتك، واخلي كرامتك، في حالة هزال
وتلبس قضيه، وتصبح رزيه، وباقي حياتك، تعيش في انعزال
حتقبل ححبك، حترفض حلبك، حتطلع حتنزل، حجيبلك جمـال
المصدر: مصريون بلا حدود
المؤلف: غير معروف
