زاد.. وزوادة

غمض عينك ...اسرح بعيد ...فاكر و انت صغير ؟؟؟

فاكر رمضان زمان ...فاكر صوت مدفع رمضان ...

طيب فاكر ... ساعة المغرب تلاقي ناس مالية الشارع تعزم على كل اللي يعدي عشان يفطر ...مصريين !!!

ما شفتش قبل كده واحد بيصرخ في اتوبيس عشان اتنشل ....و فجأة تلاقي كل اللي في الاتوبيس بيجروا عشان يرجعوا له حاجته ...مصريين !!!

شفت قبل كده بنت بتزعق ... عشان واحد عاكسها ...و بعدين تلاقي الناس كلها بتساعدها و تدافع عنها ...و كأنها أختهم أو بنتهم ..مصريين !!!

مشيت قبل كده على الكورنيش ...شايف مية نيلك ... شايف مركب شراعي فيها واحد تعبان مطحون ...بيرمي شبكة صغيرة يطلع بيها قوت يومه ...شايفه بيضحك ازاي مع ابنه ...شايف مراته قاعدة في طرف المركب بتعمل شاي على منقد و فحم ...مصريين !!!

شامم نسيمها ... شايف ناسها ... شايف أهرامتها ... شايف بحرها ....تخيل لو بقيت فجأة من غير ده كله ...حاسس بإيه ...بتحبها ... مصر اللي بتضمنا ... نبض الحياة في دمنا ... نوهب عشانها حياتنا ... لو كنا بنحبها ...فكرتي جت ازاي ...نزلت موضوع مصر التي في خاطري في قهوة المنتدى ...و بالصدفة لقيت هاميس مغيرة اسمها في الماسنجر لكلمة في حب مصر ..

و في رد مي خاطر على موضوع ( مصر التي في خاطري ) ... يحبها اولادها حب الجنونفكرتي باختصار ..

تيجوا نعمل صيحة في حب مصر..

تيجي نغير عبارات الماسنجر الى كلمات في حب مصر ...

تيجي نغير توقيعاتنا ... لصور و كلمات في حب مصر ...

تيجي ندعو لحب مصر ...

أكيد هننبه ناس كتير لحب مصر ...

أكيد ده ممكن ينبه ناس كتير انهم ينتبهوا لعلاج سلبيات كتير ... أكيد هنقدر نعود نفسنا من جديد نحب بلدنا بجنون .....ابدأوا معانا ... نتكلم في حب مصر ...

عشان بعد فترة نقدر نعمل كتيير أكتر من الكلام ...أيضا في حب مصر
__________________

محمد عبد المرضي